Viku hreinsun

viku_hreinsunÞað er hægt að hreinsa á marga vegu en hér er að finna leiðbeiningar að vikuhreinsun frá Kolbrúnu grasalækni sem hún kallar hausthreinsun.

Mjög gott er að nota tímann í hreinsuninni og losa sig alfarið við kaffi, sykur, tóbak eða annað því um líkt. Ef þið takið jurtir með þá verður ferlið mun auðveldara.

Tveimur dögum áður en byrjað er á skrefi 1 er gott að taka eftirfarandi út úr mataræðinu:

  • Kaffi
  • Sykur og gervisykur
  • Hvítt kornmeti
  • Unnar kjötvörur
  • Áfengi
  • Salt (minnka neyslu)
  • Reyktan mat

Gott er að taka því einnig rólega þessa daga, fara í sund og gufu, slaka á og losa um vöðvana.

Með því að gera þetta náið þið að:

  • Hreinsa líkamann
  • Auka orkuna
  • Styrkja ónæmiskerfið
  • Hreinsa húðina
  • Auka liðleika
  • Auka framkvæmdagleði
  • Auka minni og einbeitingu
  • Lækka blóðþrýsting ef þarf
  • Bæta meltingu
  • Og ef á þarf að halda þá léttist þú

1. SKREF – Dagur 1

Morgunmatur: 

Grænn hristingur: / 2 sellerýstönglar / 3 grænkálslauf eða annað grænt laufsalat / ½ avókadó / ½ límóna / ½ gúrka / 1-2 msk olía (kókós-, hörfræ- eða ólífuolía) / vatn sem nær rétt upp að matnum í skál / 1/8 tsk himalaya salt / allt sett í blandara og mixað saman / ef þið eruð að nota jurtir þá má setja þær út í blönduna sem og olíur.

Inn á milli er hægt að fá sér jurtate eins og brenninetlute eða kamillute.

Kolbrún mælir með að nota annaðhvort Suttungamjöð allan tímann í hreinsunni. Það er mjög mikilvægt að hafa hægðir allan tímann, því þurfið þið annað hvort að nota jurtir til að örva hægðir eða nota stólpípu.

Hádegismatur

Grænmetissalat: 80% grænmeti og 20% fræ – allt grænmeti er í lagi nema sveppir. Hafið jafnt hlutfall á milli grænmetis sem er léttgufusoðið eða rifið fínt (s.s. spergilkál, blómkál, rófur, gulrætur) og fersks blaðsalats. Notið þið hugmyndaflugið. Notið möndlur, hampfræ, sólblómafræ, sesamfræ og graskersfræ en þau þurfa helst að liggja í bleyti í 6-8 klukkutíma fyrir neyslu.

Dressing: sítrónusafi og olía með jurtakryddi í.

Seinnipartinn er hægt að fá sér hnetur, grænmeti eða ávöxt og te.

Kvöldmatur

Kælandi Kichadi: / ½ bolli basmati hýðishrísgrjón / ¼ bolli mung baunir / 1 msk króklappa / 1 ½ bolli grænar strengjabaunir / 2 msk smjör eða ghee / ½ tsk fennelfræ / 1 tsk cummin / 1 msk amarant (val) / 1 stykki kombuþang / 6-10 bollar vatn / ½ tsk sjávarsalt / 1 msk kóríander duft

  1. Baunir þarf að leggja í bleyti í 12 tíma áður en þær eru notaðar. Þvoið grjónin og baunirnar þar til vatnið er tært.
  2. Hitið feitina við meðalhita, setjið svo fennel og cumminfræ út á pönnuna og hitið í nokkrar mínútur.
  3. Setjið svo grjónin og baunirnar út í og hitið í nokkrar mínútur.
  4. Setjið svo strax á eftir króklöppuna og hitið í 1 mínútu.
  5. Þá eru 6 bollar vatn settir út í og suðan látin koma upp. Setjið þá kombú, amaranth og salt út í þegar suðan er komin upp.
  6. Lækkið hitann þá niður í meðal lágan hita og látið malla í 1 – 1 1/2 klukkutíma. Bætið við vatni ef þarf.
  7. Þegar 10 mínútur eru eftir af suðu, bætið grænum baunum við. Rétt áður en rétturinn er borinn fram setjið þá kóríander duftið út í. Bragðbætið með ferskum kóríanderlaufum.

Þessi réttur er mjög blóðhreinsandi. Króklappan hreinsar nýrun og lifrina, meðan grænu baunirnar eru vökvalosandi. Mung baunirnar og grjónin henta öllum og eru notuð sem undirstaða í indverskri panchakarma hreinsun og svo eru valdar jurtir eftir því hvað hentar hverjum og einum. Því getið þið gert þetta og notað innsæið ykkar á það hvaða krydd þið eigið að nota og ekki er nauðsynlegt að halda rammfast í uppskriftina og það má nota annað krydd. Ef þið þurfið ekki að kæla ykkur þá megið þið nota engifer, svartan pipar, hvítlauk eða kardimommur til að hita.

Dagur 2

Gerið nákvæmlega sama og dag 1.

2. SKREF – Dagur 3

Hér hefst fastan. Þið drekkið bara þegar þið verðið svöng ef ykkur finnst 3 tímar of langt á milli. Það má pressa safa fyrirfram. Ekki taka nein bætiefni eða lyf í föstunni (ef þið notið lyf þá verðið þið að hafa samband við grasalækni eða lækni og kanna hvernig þið gerið þetta).

Veljið einhvern af eftirfarandi söfum til að fasta á. Ef þið viljið þá þarf ekki að vera heilagur og halda sig við sama safann. Yfir allan daginn þurfið þið að drekka 2 lítra af grænmetissafa og 1 lítra af vatni til viðbótar.

  1. gúrku, sellerý, eitthvað grænt kál og sítrónu ( 1 tsk pr. glas)
  2. gulróta, sellerý og rauðrófusafi.
  3. grænmetissafi (blandaður) frá Yggdrasil
  4. hýðishrísgrjón – fyrir þá sem hræðast það að vera bara á fljótandi. Þá notar maður soðin hrísgrjón með engu kryddi og borðar þangað til maður er saddur.
  • Klukkan 7:30 – 3 dl safi
  • Klukkan 10:30 – 3 dl af völdum safa og kannski te með.
  • Klukkan 13:30 – 4 dl af völdum safa.
  • Klukkan 16:30 – 3 dl af völdum safa og kannski te með
  • Klukkan 19:30 – 4 dl af völdum safa
  • Klukkan 22.00 – 3 dl af völdum safa

 

Dagur 4 og 5

Gerið alveg eins og á degi 3

3. SKREF – Dagur 6 og 7

Hér brjótið þið föstuna og byrjið aftur á því sama og á degi 1. Eftir þetta má byrja á prógramminu í bókinni „Betri næring, betri líðan“ eða láta þetta bara gott heita.

Eftirfarandi er gott að hafa í huga í föstunni:

  • Svefn er mjög mikilvægur og helst að fara að sofa klukkan 22.30
  • Gera teygjur eða jóga
  • Fara í sauna
  • Fá góða hvíld
  • Fara í léttar útigöngur
  • Fara í bað með salti, þara, jurtum eða ilmkjarnaolíum til að hreinsa meira
  • Þurrburstun á húð
  • Róa hugann, gera einbeitingaræfingar og stunda hugleiðslu
  • Drekka ferskt vatn
  • Stólpípur, ristilskolun eða jurtir sem hreinsa ristil eins og Vaðgelmir.

 

 

 

 

 

Leave a Reply